ائوده بیر ایل آه چکرم خبر یوخ
ائودن چیخام، من اویانا، یارگلیر
تای- توشلاریم، چوله چیخا، گون چیخار،
من چیخاندا یاغیش گئتسه، قار گلیر
یازیغ قوزوم! آجلیغا دوز، داریخما،
بوگون- صاباح باهار گلیر، بار گلیر
بیزه گله- گلمیه، بیر کال اییده،
قونشوموزا هیوا گلیر، نار گلیر
خان ایوئینه، شر گله، قویروق بولار
بیزیم ائوه، کور ایت گله، هار گلیر
خلقه قوناق گلیر، گوزی سورمه لی،
بیزیم ائودن، کور گئتمه میش، کار گلیر
بختیمه آرواد نه چیخا، بیلمیرم؟
بللی دی کی سارساغا، سوسار گلیر
بیر اوچ اتک اندازا دیر اینیمه،
سالیسبوری گن گلمه سه دار گلیر.
دولتلی یه یاس دا گله اوینایار،
بیز کاسیبا توی گله، آخسار گلیر
غم یوکوندن، کدخدانین حصه سی،
خردل اولی، بیزیمکی خالوار گلیر
کتده بیزی دویله، بیر هاوار یوخ،
بیز بیر کلمه حق دانیشساق، جار گلیر
داغا شاییر لار بیزه سرکار چیخار،
دار دیبیندن قورتولار، سردار گلیر
بوندان بئله، ئوزگه گوره م، ئوزگه دن-
منت چکیر، غیرتیمه آر گلیر
ایشچی، تویوق کسنده من باخانمام،
بیلمم نئجه اوره گینده وار گلیر؟
غمدن منیم، بیر عینک وار گوزومده
ایشیق - آیدین گون، گوزومه تار گلیر
عشقیم دوشوب یادیمه، گوزلر داشار،
باهاردا سئل آتلانی- چایلار گلیر
چوخ شاعیرین طبعی دونار بوز کیمین،
شهریارین شعری ده، قاینار گلیر
یادداشت های منتشر شده قبلی در رابطه با ادبیات ترکی:
آنا دیلیم اولن دییل*** باشکا دیله دونن دییر
کوراوغلو (به ترکی آذربایجانی: Koroğlu)